تارازدا «بىرلىك ءتۇبى – بەرەكە» قوعامدىق فورۋمى وتەدى

بەرىك ءۋالي ۇلى وتكەن جىلى باسقارما تاراپىنان جوسپارلانعان ءىس-شارالار مەن كوزدەلگەن ماقساتتى ينديكاتورلار ورىندالعانىن جەتكىزدى. وتكەن جىلى باسقارمانىڭ ۇيىمداستىرۋىمەن 52 ءىس-شارا وتكىزىلگەن ەكەن. «ولار ۇلتتىق جانە مەملەكەتتىك مەرەكەلەر, استانا قالاسىنىڭ 20 جىلدىعى, سونىمەن بىرگە, رەسپۋبليكاعا تانىمال جۋرناليستەر, تاريحشىلار, زيالى قاۋىم وكىلدەرى, بلوگەرلەر, قوعام وكىلدەرىنىڭ قاتىسۋىمەن ءارتۇرلى شارالار ۇيىمداستىرىلدى. وتكەن جىلى قوعامدىق-ساياسي احۋالدىڭ تۇراقتىلىعى ساقتالىپ, ەتنوسارالىق جانە دىنارالىق شيەلەنىستەر ورىن الۋىنا جول بەرىلگەن جوق», دەدى بەرىك قۇرمانعالي.

  باسقارمانىڭ نەگىزگى جۇمىستارىنىڭ ءبىرى – مەملەكەت باسشىسىنىڭ جولداۋى مەن مەملەكەتتىك باعدارلامالاردى حالىققا ءتۇسىندىرۋ بولىپ تابىلادى. وسى باعىتتا قۇرامىندا 89 مۇشەسى بار 11 اقپاراتتىق توپ قۇرىلعان. باسقارما باسشىسى ءوز سوزىندە, قازىرگى تاڭدا توپ قۇرامىندا جوعارى وقۋ ورىندارىنىڭ پروفەسسورلارى, ساراپشىلار, سونىمەن بىرگە, «7-20-25» باعدارلاماسىن ءتۇسىندىرۋ ءۇشىن بانك قىزمەتكەرلەرى ەنگىزىلگەنىن اتاپ ءوتتى. سونىمەن قاتار, اقپاراتتىق جۇمىس اقپان ايىنان باستاپ, بەكىتىلگەن كەستەگە سايكەس جۇرگىزىلەدى.

  بۇگىنگى تاڭدا جامبىل وڭىرىندە 63 بۇقارالىق اقپارات قۇرالدارى قىزمەت ەتەدى. «تسيفرلى قازاقستان» باعدارلاماسى بويىنشا وتكەن جىلى جامبىل وبلىسى العاشقىلاردىڭ ءبىرى بولىپ تسيفرلىق ەفيرلىك حابار تاراتۋ جۇيەسىنە كوشتى. بۇل رەتتە, وڭىردەگى اتاۋلى الەۋمەتتىك كومەك الۋشىلارعا قولداۋ كورسەتىلىپ, 2400 وتباسىعا جەرگىلىكتى بيۋدجەت ەسەبىنەن 13 528,0 مىڭ تەڭگە ءبولىنىپ, تسيفرلى جالعامالار الىپ بەرىلگەن.

  بەرىك قۇرمانعالي وتكەن جىلعى اتقارىلعان وسى جانە وزگە دە شارالاردى قورىتىندىلاي كەلە, باسقارمانىڭ الداعى جۇمىسىنا دا توقتالدى. «بيىلعى جىلى جامبىل وبلىسىنىڭ 80, ت.رىسقۇلوۆتىڭ 125, وبلىستىق «زناميا ترۋدا» گازەتىنىڭ 100, «Jambyl» تەلەارناسىنىڭ 30 جىلدىعى جانە «بىرلىك ءتۇبى – بەرەكە» قوعامدىق فورۋمىن ۇيىمداستىرۋ جوسپاردا تۇر», دەدى باسقارما باسشىسى.

حاميت ەسامان,

«Egemen Qazaqstan»

جامبىل وبلىسى